Ingezonden stuk van Abram Capello in Amigoe di Curaçao:
Un Tributo na un gran Senor Jacobo Palm, un musico "Par excellence"
Bibando band'e pro katedral di Santa Ana, fo'i jong m'a konosé Shon Coco Palm. Ora m'a bira sirbido di misa,
m'a konosé su musika di orgel hopi mas mihó.
Nunka mi por lubidá kon e tabata kompanyá "Prefatie" i "Pater Noster" ora Pastor Smit of Pader Schipper tabata
hasi misa kantá of solèm. Tur e dos sacerdotenan aki tabata gosa un mundo di e kompanyamentu. Tur e padernan aki
tabata hombernan ku un stem sonoro. Na okashon di Respons
kantá of solem, Shon Coco tabata dal e marcha funebre di Chopin, ku henter misa tabata ril! Carl Fensohn, músiko
i consul general di Alemania a yega di bisami: "Ese hombre es un gran maestro, un Genio, formidable"!
Na misanan pontifical ku obisponan manera Mgr. Vuylsteke (un dje deftignan), Mgr. Verriet, Mgr. Zeppenfeldt,
ku presencia di un gouverneur manera Fruytier van Slobbe (e gran militar), Wouters, Kasteel, e orgel di Shon
Coco tabata dominá e misa i luga di hendenan resa tur tabata waak na direkshon di koor. Asina impresionante i
magistral e musika ku tabata bini dje gran Maestro tabata. M'a kompanya Shon Coco durante hopi anya ku un grupo
chiki di otro musikonan na varios okashon. Esunan mas importante pa mi tabata e misa di Pasku marduga. Inolvidable
tabata e funshonnan di e grupo di damas "La Charité" i "Santa Cecilia" na Teatro Brion!
Marchanan básico manera "High School Cadets" (Sousa) i " Hungarian Dance no 5" (Brahms) tabata e piesnan di entrada.
Nos tur a gosa, anto hopi! I Shon Coco, semper chistoso i gewoon. Dia mi tabatin ku hala na pia pa mi trabou den
Mundo Nobo, hopi bes Shon Coco bayendo Habaai tabata stop auto ku e chauffeur Abelino pa mi hanya un kabé'i boto
te Mundo Nobo. Ta duel mi mashá ku dia e tabata bai kumpli 90 anya i un biaha mas, despues dje dia ey ku mi a pidi
e autoridatnan konserni pa laga Shon Coco mes inaugurá su kaya of su plaza ku su number ariba, mi no a hanya un
kontesta. Te ainda aki na Antiyas nos ta antikuá i nos no ke weta na Merka of otro luga mas progresivo, kaminda
e hendenan mes ta inaugurá bapor, submarino, plaza i kaya ku nan number!! Esaki te ainda ta duel mi mashá.
Shon Coco, danki pa tur cos. Mi sá ku tur loke ku Bo a hasi tabata manera ta inscribi riba Bo orgel di Sta. Ana
"Ad Majorem Dei Gloria". Sosega na paz.
Abram Capello
Na Memoria
Di Jacobo Jose Maria Palm (Shon Coco)
Musik tabata su ilusion
Ku ne e tabata trese paz y union
Sinjando tur hende lesa jabi SOL
Dunando identidad na musik di Korsow
Ora bisa wals bo bisa Shon Coco
Su partituranan ta hasi bo loco
Hasta san Pedro sa baha foi shelo biba lur
Ta ken ta toka musik di papa Dios den scur
Piano tabata e instrument di su bida
Ku ne e ta duna wals mazurka y danza pia
Compositando sin kansa un kasi tur dia
Pa awe nos por saborianan ku alegria
Shon Coco Palm su kurpa a bai laga nos
Pero su alma musikal a keda serka nos
Y foi banda ariba te bando abow
Korsow hamas lo lubida su bon trabow
Danki SHON COCO PALM (R.I.P.)
BOEIS HAILE
Jacobo Palm den memoria
KU NOS PAIS TA riku na talento i musika esei no tin duda. Atraves di aña nos pais a konose varios personahe grandi,
ku sea pa nan estilo di bida, nan trabou ò talento a hasi nan nomber inolvidabel den pueblo. JACOBO PALM awor tambe
ta forma parti di e inmortalnan den ambiente musikal. Su aporte na musika Antiano sin duda ta grandi i su
komposishonan a juda enrikese nos tesoro nashonal musikal.
Jacobo a nase dia 28 di november 1887 i tabata yu di Sr. Antonio Palm, otro miembro di e famia Palm ku den e epoka
ey tabata domina ambiente musikal di Korsou. Shon Coco Palm manera e tabata konosi den pueblo, a kuminsa na edat
hoben den musika, ku 7 aña e ta tuma les di musika serka su tawela Gerrie Palm i a haña un bon base pa despues e
sigui desaroya su mes den musika. Na edat di 20 aña ya e por domina diferente instrumento i tambe e por kuminsa
duna les na hobenan di su tempu. Na aña 1917 na ta nombre muziekleraar na Welgelegen, ku den e tempu ey tabata un
"kostschool". Tambe Shon Coco a duna su servisio na misa di Santa Ana den Otrobanda, na unda ela keda komo organista
durante mas ku 50 aña, demostrando konsistensha den su trabou i amor pa su profeshon.
Ademas Shon Coco a aktua tambe banda di varios musiko internashonal i a duna presentashonan solo den diferente sitio.
Su saber amplio i abilidat pa interpreta musika klasika a pone ku nan a nombre tambe 'concertmeester' di orkesta
Filharmonika di Korsou. Tambe Shon Coco a forma parti pa varios aña di e Strijkkwartet di Korsou ku a duna varios
pretentashon eksitoso.
Ademas di ta konosi pa su komposishonan speshal pa misa Shon Coco tambe a komposita hopi otro piesa den estilo
popular manera Wals, Tumba, Mazurka, etc. Algun di e komposishonan aki ku a duna masha pupularidat den su tempu
ta e.o. Corazon en la mano, Victoria, mi consuelo, elsa maria, 12 de mayo, eliza, ave de paso i lagami na mi
lugar.
Sin duda e aporte di Jacobo Palm na nos musika ta grandi i esaki lo keda pa semper un rekuerdo inolvidabel pa
generashon ku lo bini! Pesei tambe den su tempu ela sa di gana kariño i apresio di un i tur. Komo rekonosimentu
pa su labornan ela ser kondekora na varios okashon p.e. ku Ridder in de Orde van Oranje Nassau.
Resientemente su nietu Dr. Robert Rojer a graba un LP ku komposishonan di dje di e perioda entre 1905 i 1925 ku
tabata un tempu bryante pa e gran musiko aki. Pa esnan ku na bida a konose e gran persona aki si duda pa semper
den nan memoria i pa esnan ku no a konose, nan konsuelo la su komposishonan ku lo keda pa semper komo un
monumento perpetuo den musika Antiano....
Paz na su restunan
E Dekano di musikonan a bai sosega, despues ku no muchu dia pasa ela risibi su promoshon komo "Officier in de Orde van Oranje Nassau". Distinshon Real otorga na su persona pa honra musikonan antianu. "Shon Coco Palm", manera Antia i mundu konose no a buska honor i gloria pa su mes, sino pa lokual durante henter su bida ela edifica, "ekspreshon musikal di nos ku ta yu di e tera aki". Su grandesa ta su firmesa den tur simplesa. Su fe, su amor i dedikashon a inspire pa inmortalisa e Dekao "Shon Coco Palm", su fakultat "Music Antianu" i "Nos Pueblo", ku sea ta kompone, aregla, kanta, toka, balia, ta siña of scucha musik antianu. Ku pa su sernan keri sea di konsuelo ku ekonan di su alma lo keda resona pa semper den nan kurason, loke ta hasi ku Shon Coco nunka lo muri.
Dekano Sosega na Pas.
Prome Minister di Antia Ulandes,
Don Martina